Një konflikt fizik është regjistruar në zonën e Urës së Plepave, në Durrës, ku disa persona janë përfshirë në një sherr pas një mosmarrëveshjeje për përparësinë e kalimit.
Sipas pamjeve që po qarkullojnë në rrjetet sociale, disa persona shihen duke u goditur mes vete në mes të rrugës, ndërsa konflikti ka shkaktuar tension dhe ka tërhequr vëmendjen e kalimtarëve dhe drejtuesve të automjeteve.
Sipas informacioneve të raportuara, përplasja dyshohet se nisi pasi palët nuk arritën të bien dakord se kush do të kalonte i pari në urë. Debati verbal ka eskaluar brenda pak çastesh në përleshje fizike.
Personi që ka dërguar pamjet pretendon se në konflikt janë përfshirë dy shtetas shqiptarë që jetojnë në Itali, megjithatë ky informacion nuk është konfirmuar zyrtarisht nga autoritetet.
Për disa minuta, sherri ka bllokuar lëvizjen normale të automjeteve në këtë segment rrugor, duke krijuar kolona dhe shqetësim për drejtuesit e mjeteve.
Deri më tani, Policia nuk ka dalë me një njoftim zyrtar lidhur me rastin dhe nuk dihet nëse ka persona të shoqëruar apo proceduar pas incidentit.
Ngjarja rikthen në vëmendje rëndësinë e respektimit të rregullave të qarkullimit dhe ruajtjes së qetësisë në trafik, pasi mosmarrëveshje të vogla mund të përshkallëzohen shpejt në konflikte fizike që rrezikojnë sigurinë e të gjithë pjesëmarrësve në komunikacion.
Be First to Comment