Partia Demokratike e Kosovës i përgjigjet Kurtit

PDK i përgjigjet Kurtit

Partia Demokratike e Kosovës (PDK) i është përgjigjur zyrtarisht ftesës së kryeministrit në detyrë, Albin Kurti, për takim, duke bërë të qartë se nuk do të jetë pjesë e shumicës qeverisëse dhe se do të vazhdojë të ushtrojë rolin e saj në opozitë.

Në letrën e siguruar nga Klan Kosova, e cila mban nënshkrimin e kryetarit të PDK-së, Bedri Hamza, thuhet se partia i referohet takimit të zhvilluar më 10 korrik, si dhe qëndrimeve të shprehura më herët në publik, duke theksuar se pozicioni i saj politik nuk ka ndryshuar.

“Në rrethanat aktuale, qëndrimi ynë është që të vazhdojmë të qëndrojmë në opozitë”, thuhet në përgjigjen zyrtare të PDK-së.

Në letër, PDK thekson gjithashtu se pret që Albin Kurti, si fitues i zgjedhjeve parlamentare të 7 qershorit 2026, të marrë përgjegjësinë për sigurimin e shumicës parlamentare dhe arritjen e një marrëveshjeje me partitë e tjera politike për formimin e institucioneve të reja të Republikës së Kosovës.

Sipas partisë, përgjegjësia për krijimin e institucioneve i takon subjektit që ka dalë i pari në zgjedhje, ndërsa PDK nuk sheh arsye për të ndryshuar pozicionin e saj aktual.

Ndërkohë, sipas raportimeve, edhe Aleanca për Ardhmërinë e Kosovës nuk pritet t’i bashkohet takimit të thirrur nga Kurti, pasi vazhdon të insistojë në ofertën e saj prej gjashtë pikash si bazë për çdo bashkëpunim politik.

Qëndrimi i PDK-së vjen në një kohë kur Lëvizja Vetëvendosje po zhvillon përpjekje për të siguruar mbështetjen e nevojshme për konstituimin e Kuvendit dhe formimin e institucioneve të reja, ndërsa vëmendja tashmë është përqendruar te bisedimet me Lidhjen Demokratike të Kosovës.

Me këtë përgjigje, PDK riafirmon se do të mbetet në opozitë dhe nuk do të jetë pjesë e një koalicioni qeverisës me Lëvizjen Vetëvendosje.