Ja çka ndodhi në Sunny Hill që nuk u raportua në media

Një incident është regjistruar gjatë mbrëmjes së djeshme në festivalin Sunny Hill, ku disa të rinj janë përfshirë në një përleshje fizike, duke krijuar tension dhe shqetësim mes të pranishmëve.

Sinjali ka siguruar pamje ekskluzive nga vendi i ngjarjes, ku shihen disa persona duke u goditur mes vete, ndërsa pjesëmarrës të tjerë përpiqen të ndërhyjnë për t’i ndarë dhe për të parandaluar përshkallëzimin e konfliktit.

Në video, atmosfera duket e tensionuar për disa çaste, ndërsa përleshja zhvillohet në prani të shumë vizitorëve që po ndiqnin aktivitetet e festivalit.

Ende nuk dihen shkaqet që çuan deri te konflikti, ndërsa nuk është bërë e ditur nëse nga incidenti ka persona të lënduar apo të arrestuar.

Deri në momentin e publikimit të këtij lajmi, organizatorët e festivalit dhe Policia e Kosovës nuk kanë dalë me një deklaratë zyrtare lidhur me rastin.

Rrethanat e plota të incidentit mbeten të paqarta dhe pritet që autoritetet kompetente të sqarojnë nëse do të ndërmerren veprime lidhur me përleshjen e ndodhur gjatë festivalit.

Pamjet e incidentit janë shpërndarë me shpejtësi në rrjetet sociale, duke nxitur reagime të shumta nga qytetarët dhe pjesëmarrësit në festival.