Ikballe Huduti ishte mysafire në emisionin “Kojshia Show”, ku foli për herë të parë gjerësisht rreth vendimit të autoriteteve shqiptare për ta shpallur “non grata”, duke dhënë versionin e saj për këtë çështje.
Gjatë intervistës, Huduti deklaroi se masa ndaj saj erdhi vetëm për shkak të pjesëmarrjes në protesta, duke mohuar kategorikisht çdo pretendim se ka lidhje apo vepron në interes të ndonjë shteti të huaj.
Ajo hodhi poshtë akuzat që, sipas saj, janë përhapur në opinion, duke theksuar se nuk është agjente e Iranit, Izraelit apo e ndonjë strukture tjetër.
Një nga momentet që tërhoqi më shumë vëmendjen gjatë emisionit ishte kur Ikballe Huduti ndërpreu intervistën dhe hoqi mbulesën para kamerave.
Me këtë veprim, ajo tha se dëshironte t’u jepte përgjigje të gjithë atyre që, sipas saj, e kanë paragjykuar.
“Jam shqiptare dhe nuk mbulohem më”, u shpreh Huduti gjatë emisionit.
Deklaratat dhe veprimi i saj kanë ngjallur reagime të shumta në rrjetet sociale, ku intervista është komentuar gjerësisht nga qytetarët.
Huduti foli edhe për mënyrën se si, sipas saj, është trajtuar në opinion pas shpalljes “non grata”, duke insistuar se vendimi nuk lidhet me ndonjë aktivitet të paligjshëm, por me pjesëmarrjen e saj në protesta.
Intervista e plotë me Ikballe Hudutin është transmetuar në emisionin “Kojshia Show”, ku ajo trajton edhe tema të tjera që lidhen me jetën dhe aktivitetin e saj publik.
Be First to Comment