Zjarr i madh në Nakaradë të Fushë Kosovës

Një zjarr i madh ka shpërthyer pasditen e sotme në fshatin Nakaradë të Fushë Kosovës, duke shkaktuar shqetësim te banorët e zonës.

Zjarri ka përfshirë një sipërfaqe fushore, ndërsa përhapja e tij po favorizohet nga erërat e forta që po mbizotërojnë në zonë.

Sipas informacioneve të raportuara nga lexuesit për Klan Kosova, flakët kanë nisur të përhapen dhe po lëvizin në drejtim të shtëpive, duke rritur rrezikun për pronat dhe banorët përreth.

Pamjet e siguruara nga vendi i ngjarjes tregojnë përmasat e zjarrit dhe tymin që është ngritur mbi zonën e përfshirë nga flakët.

Për shkak të erërave të forta, situata mund të ndryshojë me shpejtësi, ndërsa ekipet emergjente janë mobilizuar për ta lokalizuar zjarrin dhe për të parandaluar përhapjen e mëtejshme të tij.

Nga Brigada e Zjarrfikësve të Prishtinës është konfirmuar se ekipet tashmë kanë dalë në terren dhe janë duke intervenuar.

Zjarrfikësit po punojnë për vënien nën kontroll të flakëve, veçanërisht në pjesët ku zjarri rrezikon të afrohet pranë zonave të banuara.

Deri në këtë moment nuk është raportuar për persona të lënduar dhe nuk ka informacione të konfirmuara për dëme në shtëpi apo objekte të tjera.

Gjithashtu, ende nuk dihet se çfarë e ka shkaktuar zjarrin që ka përfshirë fushën në Nakaradë.

Situata mbetet duke u monitoruar, ndërsa priten informacione të tjera nga ekipet emergjente lidhur me përmasat e zjarrit dhe dëmet eventuale.