Një moment jo fort i zakonshëm nga një dasmë në Kukës ka tërhequr vëmendjen, pasi mes muzikës dhe atmosferës festive, dasmorët janë parë duke kërcyer rreth një karroce dore, të llojit që përdoret zakonisht në punimet e ndërtimit.
Pamjet janë filmuar nga një qytetar i pranishëm në dasmë, i cili më pas ia ka dërguar videon redaksisë së JOQ Albania, duke treguar se skena i kishte bërë përshtypje.
Në video, festa vazhdon normalisht, ndërsa dasmorët kërcejnë të grumbulluar rreth karrocës, e cila duket se është shndërruar për disa momente në një prej elementeve kryesore të atmosferës.
Në sfond dëgjohet kënga për kurbetin
Ajo që e bën skenën edhe më interesante është muzika që shoqëron momentin.
Teksa dasmorët kërcejnë rreth karrocës, në sfond dëgjohen vargjet e këngës së njohur për kurbetin: “O kurbet, kurbet i zi”.
Kombinimi i këngës për jetën në mërgim me karrocën e punës ka nxitur interpretime të ndryshme, megjithëse nuk dihet nëse gjithçka ka qenë e organizuar me një domethënie të caktuar apo thjesht një moment spontan gjatë dasmës.
Nuk ka informacione nëse karroca lidhet me profesionin e dhëndrit, të ndonjë familjari apo të ndonjë prej dasmorëve.
Qytetari: Më bëri shumë përshtypje
Personi që ka filmuar pamjet ka treguar se ishte i pranishëm në dasmë dhe pikërisht karroca mes dasmorëve ia kishte tërhequr vëmendjen.
“Përshëndetje JOQ, isha në një dasmë sot në Kukës dhe më bëri shumë përshtypje kjo karroca në dasmë”, ka shkruar qytetari.
Dasmat shqiptare njihen për atmosferën, traditat dhe improvizimet e ndryshme që shpesh krijojnë momente të veçanta, por kësaj radhe një karrocë ndërtimi ka mjaftuar që festa në Kukës të marrë një tjetër dimension.
Nëse ishte një simbolikë për punën dhe kurbetin apo thjesht një ide spontane e dasmorëve, kjo nuk dihet. Por pamjet kanë dokumentuar një prej atyre momenteve të pazakonta që vështirë se kalojnë pa u vënë re.
Be First to Comment