Albin Kurti zbulon ofertën për Lumir Abdixhikun

Kryetari i Lëvizjes Vetëvendosje dhe kryeministri në detyrë, Albin Kurti, ka zbuluar detaje nga oferta që i është bërë Lidhjes Demokratike të Kosovës (LDK) në kuadër të përpjekjeve për arritjen e një marrëveshjeje politike për formimin e institucioneve të reja.

Në një deklarim për media pas takimit me kreun e LDK-së, Lumir Abdixhiku, Kurti tha se LVV-ja i ka ofruar LDK-së pjesëmarrje në qeveri, duke përfshirë pozitën e zëvendëskryeministrit dhe disa resorë ministrorë.

“Kemi ofruar pozitën e zëvendëskryeministrit me disa ministri. E di që kohëve të fundit është përdorur togfjalëshi ‘balancë demokratike’, por brenda sistemit tonë kemi balancë demokratike dhe kemi një zonë zgjedhore. Ne ofrojmë, në përputhje me rezultatin zgjedhor, ta ndajmë përgjegjësinë me resorë ministrorë në ekzekutiv”, deklaroi Kurti.

Sipas tij, oferta e bërë përfaqëson një ftesë serioze për bashkëqeverisje dhe është ndërtuar mbi bazën e rezultatit të zgjedhjeve parlamentare.

Kurti theksoi se shpërndarja e përgjegjësive duhet të reflektojë mbështetjen që secila parti ka marrë nga qytetarët në zgjedhjet e fundit.

Ai komentoi edhe kërkesën e LDK-së që posti i presidentit t’i takojë kësaj partie, duke e cilësuar atë të papërputhshme me rregullat dhe aritmetikën parlamentare.

“LDK-ja nuk i ka as 30 vota për ta bërë propozimin në Kuvend”, u shpreh Kurti, duke lënë të kuptohet se kërkesa e kësaj partie për postin e presidentit nuk është e realizueshme në rrethanat aktuale.

Deklaratat e Kurtit vijnë pasi takimi disaorësh me Lumir Abdixhikun nuk prodhoi marrëveshje politike. Më herët gjatë ditës, lideri i LVV-së deklaroi se ekziston një dallim i madh mes rezultatit zgjedhor dhe kërkesave të LDK-së, ndërsa Abdixhiku u përgjigj se palët mbeten “shumë, shumë larg marrëveshjes” dhe se pa një balancë institucionale nuk mund të ketë dakordim politik.

Pavarësisht mosarritjes së një marrëveshjeje, kontaktet ndërmjet partive politike pritet të vazhdojnë në përpjekje për zhbllokimin e procesit të konstituimit të Kuvendit dhe formimin e institucioneve të reja të Kosovës.