Një incident me zyrtarët policorë është regjistruar në Malishevë, ku dy persona janë arrestuar nën dyshimin se kanë penguar policinë gjatë kryerjes së detyrës zyrtare, ndërsa njëri prej tyre dyshohet se ka sulmuar fizikisht efektivët edhe brenda stacionit policor.
Sipas raportit 24-orësh të Policisë së Kosovës, ngjarja ka ndodhur të shtunën, më 2 gusht.
Policia bën të ditur se fillimisht dy të dyshuarit kanë penguar zyrtarët policorë gjatë ushtrimit të detyrës së tyre. Më pas, pasi janë shoqëruar në stacionin policor, njëri prej tyre dyshohet se ka sulmuar fizikisht policët.
Si pasojë e incidentit, tre zyrtarë policorë kanë pësuar lëndime dhe kanë kërkuar trajtim mjekësor.
“Janë arrestuar dy të dyshuar meshkuj kosovarë pasi të njëjtit kanë penguar zyrtarët policorë në kryerjen e detyrës zyrtare, si dhe brenda stacionit policor njëri prej tyre ka sulmuar fizikisht zyrtarët policorë. Si pasojë e sulmit tre zyrtarë kanë kërkuar tretman mjekësor”, thuhet në njoftimin e Policisë së Kosovës.
Me vendim të Prokurorit të Shtetit, të dyshuarit janë ndaluar për 48 orë, ndërsa ndaj tyre është iniciuar procedurë penale për veprat “Pengim i personit zyrtar në kryerje të detyrave zyrtare” dhe “Sulm ndaj personit zyrtar”.
Autoritetet kanë bërë të ditur se hetimet për rastin janë në vazhdim, ndërsa pritet të sqarohen plotësisht rrethanat që çuan në incidentin ku mbetën të lënduar tre zyrtarë policorë.
Shënim: Personat e përmendur në këtë artikull prezumohen të pafajshëm derisa fajësia e tyre të provohet me vendim të formës së prerë nga gjykata.
Be First to Comment