LAJM I FUNDIT – Nënë e bir humbin jetën në aksident

Një aksident i rëndë rrugor me pasoja tragjike është regjistruar mëngjesin e së premtes në Greqi, ku kanë humbur jetën dy shtetas shqiptarë, nënë e bir.

Sipas mediave greke, ngjarja ka ndodhur rreth orës 07:30 në aksin rrugor Amfipoli–Drama, pranë zonës së Paleokomit, në rajonin e Serres.

Sipas informacioneve paraprake, për shkaqe që ende nuk janë sqaruar nga autoritetet, automjeti me të cilin udhëtonin viktimat është përplasur me një kamion. Përplasja ka qenë tepër e fortë, duke shkaktuar pasoja fatale.

Si pasojë e aksidentit, kanë humbur jetën një grua 43-vjeçare dhe djali i saj 24-vjeçar, të dy shtetas shqiptarë. Ekipet e emergjencës kanë ndërhyrë menjëherë në vendngjarje, por fatkeqësisht nuk kanë mundur t’u shpëtojnë jetën.

Trupat e pajetë janë transportuar në Spitalin e Përgjithshëm të Serres, ku do t’u nënshtrohen procedurave të mëtejshme mjeko-ligjore.

Nga aksidenti ka mbetur i lënduar edhe drejtuesi 57-vjeçar i kamionit, i cili është dërguar për trajtim mjekësor në Spitalin e Përgjithshëm të Dramës. Deri më tani nuk janë bërë të ditura detaje mbi gjendjen e tij shëndetësore.

Në vendin e ngjarjes kanë dalë forcat e policisë dhe ekipet hetimore, të cilat kanë nisur ekzaminimet për të përcaktuar shkaqet dhe rrethanat e aksidentit.

Autoritetet greke po vijojnë hetimet, ndërsa pritet që në ditët në vijim të publikohen më shumë detaje lidhur me këtë ngjarje tragjike.