A po arrihet marrëveshja? Albin Kurti jep sinjalin më të fortë deri më tani

Kryeministri në detyrë, Albin Kurti, ka deklaruar se Lëvizja Vetëvendosje do të vazhdojë përpjekjet gjatë ditëve në vijim për të arritur një marrëveshje politike që do të mundësonte formimin e institucioneve të reja të Kosovës, duke theksuar se ende është herët për të parashikuar rezultatin e bisedimeve.

I pyetur nëse do të vazhdojë takimet dhe diskutimet me kryetarin e Lidhjes Demokratike të Kosovës (LDK), Lumir Abdixhiku, lidhur me krijimin e institucioneve të legjislaturës së 11-të, Kurti tha se ekziston gatishmëri për të vazhduar dialogun, por se epilogu i negociatave mbetet i hapur.

Sipas tij, ditët që kanë mbetur deri në mbajtjen e seancës konstituive do të shfrytëzohen maksimalisht për të zhvilluar konsultime dhe për të përgatitur terrenin për konstituimin e institucioneve të reja.

“Do të përpiqemi që t’i shfrytëzojmë këto ditë, në mënyrë që të jemi sa më të përgatitur kur fillon seanca për konstituimin e institucioneve të legjislaturës së 11-të. Mirëpo nuk mund ta parashikojmë ende rezultatin, nuk do të mungojnë përpjekjet. Ekziston edhe interesimi, edhe vullneti, edhe gatishmëria, por në javën e ardhshme marrim vesh gjithçka”, deklaroi Kurti.

Kryeministri në detyrë i bëri këto komente pas pjesëmarrjes në pritjen e organizuar nga Lëvizja Vetëvendosje në Prishtinë për bashkatdhetarët që kanë ardhur në Kosovë gjatë sezonit veror.

Deklaratat e tij vijnë në një periudhë kur në skenën politike po intensifikohen përpjekjet për arritjen e një marrëveshjeje që do të mundësonte konstituimin e Kuvendit dhe krijimin e institucioneve të reja.

Një ditë më parë, edhe kryetari i LDK-së, Lumir Abdixhiku, njoftoi se pas përfundimit të procesit të brendshëm zgjedhor në parti është hequr pezullimi i bisedimeve me Lëvizjen Vetëvendosje dhe se LDK-ja është e gatshme të vazhdojë diskutimet për formimin e institucioneve.

Nga ana tjetër, nënkryetari i LDK-së, Lutfi Haziri, ka deklaruar se nëse ekziston vullnet politik nga të dyja palët, marrëveshja mund të arrihet brenda 24 orëve, duke theksuar se LDK-ja mbetet e përkushtuar ndaj parimeve që i ka prezantuar në takimet e deritanishme.

Seanca konstituive e legjislaturës së 11-të pritet të mbahet gjatë javës së ardhshme, ku deputetët fillimisht do të bëjnë betimin, ndërsa më pas do të zhvillohen procedurat për zgjedhjen e kryetarit dhe nënkryetarëve të Kuvendit. Formimi i institucioneve të reja do të varet nga arritja e marrëveshjeve politike ndërmjet partive parlamentare, të cilat pritet të vazhdojnë negociatat edhe në ditët në vijim.