Deputetja e komunitetit boshnjak, Duda Balje, ka bërë të qartë se nuk do të mbështesë asnjë votim në seancën e sotme konstituive të Kuvendit të Kosovës, duke theksuar se qëndrimi i saj ndaj Lëvizjes Vetëvendosje mbetet i pandryshuar.
Para nisjes së seancës, Balje deklaroi para mediave se nuk do të votojë as për konstituimin e Kuvendit dhe as për një Qeveri të mundshme, duke argumentuar se nuk ekziston besimi i nevojshëm politik ndërmjet subjektit të saj dhe Lëvizjes Vetëvendosje.
Ajo bëri të ditur se nuk ka zhvilluar asnjë takim me përfaqësues të Vetëvendosjes dhe se gjatë kësaj periudhe nuk ka pasur asnjë zhvillim që do ta shtynte të ndryshonte pozicionin e saj.
“Jo, takim nuk kam pas. Unë nuk e ndryshoj qëndrimin prej herës së fundit. Kurrgjë s’ka ndryshuar mes partisë time dhe Vetëvendosjes dhe nuk kam asnjë arsye për të reaguar ndryshe”, deklaroi Balje.
Me këtë deklaratë, deputetja boshnjake ritheksoi se marrëdhëniet ndërmjet subjektit që ajo përfaqëson dhe Lëvizjes Vetëvendosje vazhdojnë të jenë të tensionuara, duke lënë të kuptohet se, për momentin, nuk sheh hapësirë për bashkëpunim politik.
Qëndrimi i Dudës Balje vjen në ditën kur deputetët janë mbledhur për konstituimin e legjislaturës së re, në një periudhë kur partitë politike po zhvillojnë përpjekje intensive për sigurimin e shumicës parlamentare dhe formimin e institucioneve të reja të Kosovës. Deklarata e saj pritet të ketë peshë në kalkulimet politike, pasi çdo votë konsiderohet e rëndësishme në procesin e krijimit të institucioneve të reja.
Be First to Comment