Një raportim shqetësues ka mobilizuar Policinë në orët e hershme të mëngjesit në Fushë Kosovë

Një raportim shqetësues ka mobilizuar Policinë e Kosovës në orët e hershme të mëngjesit në Fushë Kosovë, pasi autoritetet morën informacion se një person po tërhiqte zvarrë një person tjetër në rrugë.

Ngjarja është raportuar më 18 gusht, rreth orës 06:30, në rrugën “Abedin Sugojeva”.

Pas marrjes së informacionit, njësitet policore kanë dalë menjëherë në vendin e ngjarjes, ku kanë hasur një çift që, sipas raportimeve, bashkëjetonte pa kurorë.

Gazeta Sinjali raporton se bëhet fjalë për një grua me inicialet Sh.A., rreth 29 vjeçe, dhe partnerin e saj L.Sh., po ashtu rreth 29 vjeç.

I dyshuari është shoqëruar nga Policia në Stacionin Policor në Fushë Kosovë, ndërsa gruaja ka marrë trajtim mjekësor.

Gjatë deklarimit para hetuesve, 29-vjeçarja ka ngritur pretendime se incidenti i asaj dite nuk ishte rasti i parë i dhunës në raportin e tyre.

Sipas deklaratës së saj, ajo ishte përballur për rreth tre muaj me dhunë të vazhdueshme fizike dhe psikologjike nga partneri.

Gruaja ka deklaruar se rreth mesnatës së 18 gushtit, derisa ndodheshin brenda banesës së tyre, partneri dyshohet se e kishte sulmuar fizikisht.

Sipas pretendimeve të saj, 29-vjeçari e kishte goditur me grushte, duke i shkaktuar lëndime në pjesën e kokës.

Vetëm disa orë më vonë është bërë edhe raportimi që ka alarmuar Policinë, sipas të cilit një person po tërhiqej zvarrë në rrugën “Abedin Sugojeva”.

Pas ndërhyrjes së Policisë dhe marrjes së deklaratave, për rastin është njoftuar edhe prokurori kujdestar për rastet e dhunës në familje.

Me urdhër të prokurorit është iniciuar rasti “Dhunë në familje”, ndërsa ndaj të dyshuarit është caktuar masa e ndalimit prej 48 orësh.

29-vjeçari është dërguar në Qendrën e Mbajtjes në Lipjan.

Hetimet po vazhdojnë për të sqaruar rrethanat e plota të rastit dhe për të verifikuar pretendimet e ngritura nga viktima lidhur me dhunën e raportuar gjatë muajve të fundit.