Ish-deputeti Gani Geci ka dalë me një propozim për postin e presidentit të ardhshëm të Kosovës, në kohën kur partitë politike po zhvillojnë diskutime për gjetjen e një kandidati konsensual.
Geci ka propozuar që në rrethanat aktuale politike të shqyrtohet mundësia që kandidat për president të jetë Nikë Gjeloshaj.
Sipas tij, Kosova ka nevojë për një figurë që mund të sigurojë konsensus dhe të marrë mbështetje përtej ndarjeve partiake.
Geci e ka vlerësuar lart Gjeloshajn, duke e cilësuar atë si një figurë shqiptare që, sipas tij, do të mund ta ushtronte denjësisht funksionin më të lartë shtetëror.
“Unë mendoj që Kosova, në këto rrethana, për President duhet ta propozojë një kandidat konsensual, e një i tillë mund të jetë një shqiptar i madh si p.sh. Nikë Gjeloshaj”, ka shkruar Geci.
Ish-deputeti ka shkuar edhe më tej, duke thënë se zgjedhja e Gjeloshajt në krye të shtetit do të ishte nder për Kosovën.
“Do të ishte nder për Kosovën që Nikë Gjeloshaj të bëhet President”, ka deklaruar ai.
Propozimi i Gecit vjen në një moment kur çështja e presidentit është kthyer në një nga temat kryesore të zhvillimeve politike në vend.
LVV-ja dhe LDK-ja kanë zhvilluar tashmë diskutime për kriteret që duhet t’i plotësojë presidenti i ardhshëm, ndërsa është bërë e ditur se palët synojnë një figurë që mund të sigurojë mbështetje të gjerë dhe të përfaqësojë unitetin politik.
Megjithatë, propozimi për Nikë Gjeloshajn është qëndrim personal i Gani Gecit dhe deri më tani nuk ka ndonjë konfirmim se emri i tij është pjesë e negociatave zyrtare ndërmjet partive politike.
Mbetet të shihet se cilët emra do të vendosen në tavolinë gjatë takimeve të ardhshme dhe nëse propozimi i Gecit do të marrë mbështetje edhe nga përfaqësues të partive politike.
Be First to Comment