Këta janë dy emrat që po diskutohen për President të Kosovës

Pas takimit mes kryetarit të Lëvizjes Vetëvendosje, Albin Kurti, dhe atij të Lidhjes Demokratike të Kosovës, Lumir Abdixhiku, kanë nisur të qarkullojnë edhe emrat që mund të jenë pjesë e diskutimeve për presidentin e ardhshëm të Kosovës.

Sipas gazetarit Leonard Kerquki, dy prej emrave që po diskutohen mes LVV-së dhe LDK-së si kandidatura potencialisht konsensuale janë Ibrahim Berisha dhe Iljaz Ramajli.

Sipas tij, të dy emrat nuk janë të rinj në diskutimet politike për këtë pozitë, pasi kishin qenë pjesë e bisedimeve edhe më herët, para 7 qershorit.

Ibrahim Berisha, 71 vjeç, është një nga figurat e hershme të Lidhjes Demokratike të Kosovës. Ai ishte anëtar i kryesive të para të LDK-së dhe një nga themeluesit e kësaj partie, si dhe i Qendrës për Informim të Kosovës.

Berisha ka një karrierë të gjatë në gazetari, akademi dhe letërsi. Ai njihet edhe si një prej gazetarëve të “Rilindjes” që kishte hedhur librezën e Partisë Komuniste.

Emri i tij është përmendur gjatë ditës së sotme si një prej kandidatëve potencialë për president. Megjithatë, vetë Berisha ka bërë një reagim që është interpretuar si distancim nga mundësia e marrjes së kësaj pozite.

“Sot dolën ekzemplarët e parë të librit tim të ri, tri novela: ‘Rrëfimi i pendimit’. Komunikimi, kultura dhe letërsia kanë qenë dhe mbeten fokus i vetëm ku do të vazhdoj të përqendrohem”, ka deklaruar Berisha.

Emri tjetër që po përmendet është Iljaz Ramajli, 75 vjeç, një figurë me përvojë të gjatë politike dhe institucionale.

Ramajli kishte qenë nënkryetar i Kuvendit Krahinor të Kosovës, ndërsa lidhet veçanërisht me zhvillimet politike dhe kushtetuese të vitit 1990.

Ai udhëhoqi seancën e 7 shtatorit 1990 në Kaçanik, në të cilën u miratua Kushtetuta e Republikës së Kosovës.

Gjatë viteve ’90, Ramajli kishte drejtuar edhe Zyrën e Kosovës në Tiranë, duke qenë një nga figurat e angazhuara në përfaqësimin politik të Kosovës në atë periudhë.

Ramajli ishte përmendur për postin e presidentit edhe gjatë zhvillimeve politike të vitit 2011. Sipas raportimeve të asaj kohe, ai nuk kishte pranuar të merrte këtë detyrë, ndërsa më pas presidente e Kosovës u zgjodh Atifete Jahjaga.

Por Berisha dhe Ramajli nuk janë emrat e vetëm që raportohet se kanë qenë pjesë e diskutimeve.

Sipas Kerqukit, në tavolinë kanë qenë edhe emri i ish-ministrit Haki Demolli dhe ai i ish-presidentit të Kosovës, Fatmir Sejdiu.

Diskutimet vijnë pas takimit Kurti–Abdixhiku, ku dy palët nuk dolën me një kandidat përfundimtar, por konfirmuan se do të zhvillojnë konsultime të brendshme para se në takimet e ardhshme të diskutojnë për emra konkretë.

Tashmë mbetet të shihet nëse Ibrahim Berisha apo Iljaz Ramajli do të marrë mbështetjen e nevojshme për t’u shndërruar në kandidat konsensual, apo nëse LVV-ja dhe LDK-ja do të dalin me një emër tjetër.

Për momentin, as Berisha dhe as Ramajli nuk janë kandidatë zyrtarë, ndërsa informacioni se emrat e tyre po diskutohen bazohet në raportimet e publikuara dhe jo në një konfirmim zyrtar nga LVV-ja apo LDK-ja.