Një fundjavë me fluks të madh pacientësh është regjistruar në Qendrën Emergjente të QKUK-së, ku janë ofruar afro 1 mijë shërbime emergjente. Gjatë së njëjtës periudhë, 86 pacientë janë pranuar për vazhdimin e trajtimit në klinika të ndryshme të QKUK-së.
“Po ashtu, në fundjavën e fundit janë realizuar 86 pranime për trajtim në klinika të ndryshme të QKUK-së, ndërsa janë regjistruar edhe 3 raste të vdekjes (exitus)”, thuhet në njoftimin e QKUK-së.
Sipas të dhënave të publikuara nga QKUK-ja, gjatë vikendit të fundit janë trajtuar gjithsej 967 pacientë me probleme dhe lëndime të ndryshme.
291 raste vetëm në Reanimim
Numri më i madh i pacientëve është trajtuar në Reanimim, ku janë regjistruar 291 raste.
Në Emergjencën Internistike janë trajtuar 224 pacientë, ndërsa 179 të tjerë kanë marrë shërbime në Emergjencën Kirurgjike.
Në Emergjencën Ortopedike janë trajtuar 208 pacientë.
Ndërkohë, 62 persona kanë marrë shërbime në Sallën e Vogël, ku janë realizuar qepje dhe trajtime të plagëve.
72 persona të lënduar në aksidente trafiku
Një numër i konsiderueshëm i rasteve të trajtuara gjatë fundjavës lidhet me aksidentet në komunikacion.
Sipas QKUK-së, 72 persona kanë kërkuar ndihmë mjekësore për shkak të lëndimeve të marra në aksidente trafiku.
Kjo shifër tregon për një fluks të lartë të rasteve që lidhen me aksidentet vetëm gjatë një fundjave.
Armë zjarri, thika dhe përleshje fizike
Në Emergjencë janë trajtuar edhe raste të lëndimeve të shkaktuara në rrethana të tjera.
Është regjistruar një rast i lëndimit nga arma e zjarrit dhe tri raste të lëndimeve nga armët e ftohta.
Pesë persona janë trajtuar për shkak të intoksikimit, ndërsa 10 të tjerë kanë kërkuar ndihmë mjekësore pas përfshirjes në përleshje fizike.
Regjistrohen edhe tri raste të vdekjes
Be First to Comment