Në ora 11, çfarë po paralajmëron Partia Demokratike e Kosovës

Deputetja e Partisë Demokratike të Kosovës (PDK), Blerta Deliu-Kodra, ka paralajmëruar se deputetët e kësaj partie do të jenë sot në ora 11:00 në Kuvendin e Kosovës, ku, sipas saj, do të përdorin të gjitha mjetet institucionale dhe juridike për të rikthyer rendin kushtetues.

Përmes një postimi në Facebook, Deliu-Kodra akuzoi kryeministrin në detyrë, Albin Kurti, dhe Lëvizjen Vetëvendosje se po mbajnë peng institucionet dhe po veprojnë në kundërshtim me Kushtetutën.

“Nuk do të rrimë duarkryq. Në ora 11:00 do të jemi në Kuvend dhe do ta përdorim çdo mjet institucional e juridik për ta rikthyer rendin kushtetues”, ka shkruar ajo.

Sipas deputetes së PDK-së, askush nuk ka të drejtë të ndryshojë rregullat kushtetuese për interesa politike.

“As Albin Kurti, as LVV-ja nuk mund ta marrin peng Republikën dhe ta ndryshojnë Kushtetutën sipas skenarit të tyre”, theksoi Deliu-Kodra.

Ajo pretendon se qëllimi i shumicës parlamentare është ose ta çojë vendin në zgjedhje të jashtëzakonshme në një moment që i përshtatet politikisht, ose të ndikojë edhe në institucionin e Presidentit.

“Qëllimi i tyre është i qartë: ose ta çojnë vendin në zgjedhje të jashtëzakonshme në një datë që u konvenon, ose ta kapin edhe institucionin e Presidentit”, ka shkruar ajo.

Në fund të reagimit, Deliu-Kodra theksoi se Kushtetuta nuk mund të interpretohet sipas interesave politike dhe se, sipas saj, institucionet nuk duhet të mbahen peng.

“Por Kosova nuk është pronë e askujt. Kushtetuta nuk interpretohet sipas interesit politik dhe nuk guxon të merret peng”, përfundoi deputetja e PDK-së.

Deklarata e saj vjen në vazhdën e përplasjeve politike për moskonstituimin e Kuvendit të Kosovës, ndërsa PDK ka paralajmëruar se deputetët e saj do të jenë të pranishëm në Kuvend në përpjekje për të zhbllokuar procesin e konstituimit.