Deputeti i Lidhjes Demokratike të Kosovës (LDK), Arben Gashi, ka reaguar ndaj zhvillimeve të fundit në Kuvendin e Kosovës, duke paralajmëruar se situata politike po përshkallëzohet dhe se tensionet rrezikojnë të shndërrohen në përplasje fizike.
Përmes një postimi në Facebook, Gashi tha se insistimi për bllokimin e procesit të konstituimit të Kuvendit po e thellon krizën institucionale dhe po krijon një atmosferë gjithnjë e më të tensionuar.
Sipas tij, në këtë moment vendimtar po mungon një qëndrim i qartë dhe i fuqishëm i Lidhjes Demokratike të Kosovës.
“Situata në Kuvend po shkon drejt përplasjeve fizike, ndërsa insistimi për bllokimin e tij vazhdon. Në këtë moment kritik, po mungon një pozicionim i qartë dhe i fortë i LDK-së”, ka shkruar Gashi.
Ai theksoi se vendi ka nevojë për frymën politike të ndërtuar nga ish-presidenti Ibrahim Rugova, duke vlerësuar se Kosova ka nevojë për dialog dhe maturi për të dalë nga kriza.
“Në fakt, Kosovës po i mungon LDK-ja. Po i mungon fryma rugoviane. Sepse kur institucionet bllokohen dhe tensionet rriten, Kosovës i duhet më shumë dialog, maturi, shtet dhe Republikë. Është koha që LDK-ja të flasë”, u shpreh ai.
Deklarata e Gashit vjen në një ditë të tensionuar politike, pasi deputetët e PDK-së u paraqitën në Kuvend edhe pse nuk ishte caktuar vazhdimi i seancës konstituive, ndërsa përfaqësues të pushtetit dhe opozitës shkëmbyen akuza të ndërsjella për bllokimin e institucioneve.
Kriza për konstituimin e Kuvendit vazhdon ende pa një marrëveshje politike, ndërsa thirrjet për dialog dhe kompromis mes partive parlamentare janë shtuar në përpjekje për t’i dhënë fund ngërçit institucional.
Be First to Comment