Deklaratat e presidentit të Serbisë, Aleksandar Vuçiq, për mundësinë e ndryshimit të rrjedhës së lumit Ibër kanë nxitur reagime të shumta, jo vetëm në Kosovë dhe Shqipëri, por edhe nga përfaqësues të faktorit ndërkombëtar.
Pas paralajmërimeve të Vuçiqit se Serbia po shqyrton mundësinë e ndërhyrjes në rrjedhën e Ibrit, Gjermania dhe Bashkimi Evropian kanë reaguar duke theksuar se deklarata të tilla nuk janë në përputhje me objektivin e normalizimit të marrëdhënieve ndërmjet Kosovës dhe Serbisë.
Një zëdhënës i Ambasadës së Gjermanisë në Kosovë ka ritheksuar qëndrimin e Berlinit në mbështetje të pavarësisë së Kosovës dhe perspektivës së saj evropiane.
“Siç kemi deklaruar edhe më parë, Gjermania mbetet e përkushtuar ndaj pavarësisë së Kosovës dhe integrimit të saj evropian. Për të bërë përparim në këtë rrugë, Kosova dhe Serbia duhet të vazhdojnë normalizimin e marrëdhënieve përmes dialogut”, ka deklaruar zëdhënësi për Klankosova.tv.
Përfaqësuesi gjerman ka qenë i qartë edhe sa i përket deklaratave për lumin Ibër.
“Deklaratat lidhur me ndryshimin e rrjedhës së lumit Ibër nuk e mbështesin këtë objektiv”, ka thënë ai.
Gjermania u ka bërë thirrje të gjithë aktorëve politikë që të shmangin deklaratat dhe veprimet që mund të pengojnë procesin e normalizimit dhe të përqendrohen te dialogu.
Reagon edhe Bashkimi Evropian
Qëndrim të ngjashëm ka shprehur edhe Bashkimi Evropian.
Zëdhënësja e BE-së për çështjet e jashtme, Anitta Hipper, është pyetur gjatë një konference për media për deklaratat e presidentit serb dhe nëse një veprim eventual për ndryshimin e rrjedhës së lumit mund të ndikonte edhe në procesin evropian të Serbisë.
Hipper nuk është futur në një vlerësim hipotetik për pasojat konkrete ndaj procesit të anëtarësimit, por ka bërë të qartë se deklarata dhe veprime të tilla nuk kontribuojnë në normalizimin e raporteve Kosovë–Serbi.
“Deklaratat, përfshirë ato për ndryshime të mundshme të rrjedhës së lumit dhe veprimet e mundshme, nuk e mbështesin objektivin për të pasur një marrëdhënie normale ndërmjet Kosovës dhe Serbisë. Kjo mund të arrihet vetëm përmes dialogut”, deklaroi Hipper.
Reagimi i Brukselit merr rëndësi të veçantë për faktin se normalizimi i marrëdhënieve me Kosovën është i lidhur ngushtë me rrugën evropiane të Serbisë.
Deklarata e Vuçiqit shkaktoi reagime të shumta
Polemikat nisën pasi Vuçiq deklaroi se Serbia po shqyrton mundësinë e ndryshimit të rrjedhës së lumit Ibër, duke pretenduar se Beogradi ka arsye për të analizuar një mundësi të tillë.
Presidenti serb më pas e cilësoi çështjen e Ibrit si një “çështje të brendshme të Serbisë”, deklaratë që shkaktoi reagime të tjera.
Pala kosovare ka paralajmëruar se çdo ndërhyrje në rrjedhën e Ibrit mund të prekë sigurinë ujore, energjetike dhe mjedisore të Kosovës.
Çështja ka marrë dimension edhe më të gjerë për shkak të rëndësisë së sistemit Ibër-Lepenc dhe Liqenit të Ujmanit për furnizimin me ujë, prodhimin e energjisë dhe sektorë të tjerë të ekonomisë së Kosovës.
Ndaj deklaratave të Vuçiqit ka reaguar edhe Tirana zyrtare, duke kundërshtuar idenë se një ndërhyrje në një rrjedhë ujore ndërkufitare mund të trajtohet thjesht si çështje e brendshme.
Tashmë, me reagimet nga Berlini dhe Brukseli, deklaratat e presidentit serb kanë marrë edhe një dimension ndërkombëtar.
Mesazhi i Gjermanisë dhe Bashkimit Evropian është se normalizimi Kosovë–Serbi duhet të zhvillohet përmes dialogut dhe se deklaratat për ndryshimin e rrjedhës së Ibrit nuk kontribuojnë në këtë proces.
Be First to Comment