Ka përfunduar me pasoja tragjike aksidenti i rëndë i trafikut që ndodhi më 1 gusht në fshatin Raushiq (Ramun) të Pejës, ku pas disa ditësh në gjendje kritike ka ndërruar jetë Alban Xhemajli, 25-vjeçari që ishte lënduar rëndë gjatë përplasjes.
Sipas informacioneve të siguruara nga Gazeta Sinjali, i riu ishte duke marrë trajtim intensiv në Qendrën Klinike Universitare të Kosovës (QKUK), ku mjekët luftuan për disa ditë për t’ia shpëtuar jetën. Megjithatë, rreth orës 01:10 të mëngjesit të 7 gushtit, ai nuk arriti t’u mbijetojë plagëve të rënda të marra në aksident.
Sipas hetimeve fillestare, aksidenti kishte ndodhur kur drejtuesi i një automjeti, Skender Maksutaj (i lindur në vitin 1973), dyshohet se kishte kryer një kthim të pasigurt në rrugë, duke ia ndërprerë lëvizjen motoçikletës që drejtohej nga Alban Xhemajli dhe po lëvizte në të njëjtin drejtim.
Përplasja ishte e fuqishme, duke shkaktuar dëme të konsiderueshme materiale dhe lëndime trupore te disa persona. Sipas të dhënave fillestare, shtatë persona kishin mbetur të lënduar në aksident, ndërsa më rëndë ishte plagosur motoçiklisti 25-vjeçar, i cili që nga dita e aksidentit ndodhej në gjendje kritike në repartet e QKUK-së.
Pavarësisht ndërhyrjeve të stafit mjekësor dhe trajtimit intensiv që mori për disa ditë, gjendja e tij nuk arriti të përmirësohej dhe ai ndërroi jetë si pasojë e plagëve.
Pas konfirmimit të vdekjes, Policia e Kosovës ka njoftuar hetuesin kujdestar dhe Prokurorin e Shtetit. Me urdhër të prokurorit, trupi i pajetë është dërguar në Institutin e Mjekësisë Ligjore (IML) për obduksion, në kuadër të procedurave hetimore.
Me zhvillimin e ri, rasti tashmë është rikualifikuar dhe po trajtohet si aksident trafiku me fatalitet, ndërsa autoritetet kompetente po vazhdojnë hetimet për të sqaruar plotësisht rrethanat dhe përgjegjësitë që çuan në këtë ngjarje tragjike.
Vdekja e Alban Xhemajlit ka pikëlluar familjarët, miqtë dhe të afërmit e tij, ndërsa pritet që në ditët në vijim të bëhen të ditura detajet lidhur me ceremoninë e varrimit.
Be First to Comment