Përpjekjet për të zhbllokuar ngërçin politik dhe për të mundësuar konstituimin e Kuvendit të Kosovës po vazhdojnë edhe në orët e fundit para skadimit të afatit kushtetues.
Sipas burimeve të Klan Kosovës, kryeministri në detyrë dhe lideri i Lëvizjes Vetëvendosje, Albin Kurti, i ka dërguar një mesazh kryetarit të Aleancës për Ardhmërinë e Kosovës (AAK), Ardian Gjini, duke e ftuar në një takim që ishte planifikuar të mbahej në orën 18:00.
Megjithatë, sipas të njëjtave burime, Gjini e ka refuzuar ftesën, duke mos pranuar të zhvillojë takim me Kurtin.
Burimet bëjnë të ditur se kreu i Aleancës pritet të dalë me një deklarim publik më vonë gjatë ditës, ku mund të konfirmojë komunikimin me Kurtin dhe të japë detaje shtesë lidhur me arsyet e refuzimit të takimit.
Ky zhvillim vjen në një moment vendimtar për skenën politike në Kosovë, kur partitë po përpiqen të gjejnë një zgjidhje për konstituimin e Kuvendit dhe formimin e institucioneve të reja.
Lëvizja Vetëvendosje ka intensifikuar kontaktet me subjektet politike gjatë ditëve të fundit, në përpjekje për të siguruar një marrëveshje që do të mundësonte jo vetëm konstituimin e Kuvendit, por edhe krijimin e institucioneve të reja dhe zgjedhjen e presidentit në afatet kushtetuese.
Nga ana tjetër, Aleanca për Ardhmërinë e Kosovës ka mbajtur vazhdimisht një qëndrim kritik ndaj mënyrës se si Vetëvendosje ka menaxhuar procesin politik.
Më herët, Ardian Gjini kishte deklaruar se Aleanca nuk do të japë mbështetje pa një marrëveshje të qartë politike, duke theksuar se vendi ka nevojë për një qeverisje me orientim të qartë strategjik.
Ai ka bërë të ditur se Aleanca ka paraqitur disa kushte për një bashkëpunim të mundshëm, ndër të cilat përfshihen përfshirja e Kosovës në projektin amerikan të gazit, ndërtimi i një termocentrali të ri me thëngjill, politika të reja zhvillimore në ekonomi dhe energji, si dhe garantimi i një partneriteti të fortë me Shtetet e Bashkuara të Amerikës.
Gjini ka deklaruar gjithashtu se nuk është i interesuar për ndarje postesh, por për një marrëveshje që, sipas tij, do t’i shërbente interesit të shtetit.
“Ne nuk kemi hyrë në këtë proces për të kërkuar poste. Kemi paraqitur kërkesa që lidhen me orientimin strategjik dhe zhvillimin e Kosovës. Nëse nuk ka pajtim për këto tema, nuk ka arsye për bashkëpunim”, ishte shprehur më herët lideri i Aleancës.
Ai kishte kritikuar edhe qasjen e Vetëvendosjes në negociata, duke vlerësuar se nuk mund të kërkohet mbështetje politike vetëm për zgjedhjen e presidentit pa një marrëveshje më të gjerë për programin qeverisës dhe drejtimin që do të marrë vendi në katër vitet e ardhshme.
Deri në momentin e publikimit të këtij lajmi, nuk ka pasur një konfirmim zyrtar nga zyra e kryeministrit në detyrë Albin Kurti lidhur me ftesën për takim, ndërsa pritet që gjatë orëve në vijim të ketë deklarime nga palët për këtë zhvillim politik.
Be First to Comment