Kryetari i Partisë Demokratike të Kosovës (PDK), Bedri Hamza, ka reaguar ashpër pasi lideri i Lëvizjes Vetëvendosje, Albin Kurti, kërkoi kohë shtesë për të propozuar kandidatin për kryetar të Kuvendit të Kosovës në seancën konstituive të Legjislaturës së XI-të.
Hamza e cilësoi këtë veprim si mungesë serioziteti nga ana e Vetëvendosjes, duke vlerësuar se sjellja e partisë fituese po dëmton funksionimin normal të institucioneve të vendit dhe po e zvarrit procesin e konstituimit të Kuvendit.
“Kjo është një shenjë e mungesës së seriozitetit nga Vetëvendosje. Ata po vazhdojnë me sjellje të papërgjegjshme ndaj institucioneve të Kosovës. E thirrën seancën në ditën e fundit të afatit dhe në fund abuzuan me fjalime politike, duke e shtyrë propozimin për emrin e kryetarit të Kuvendit”, deklaroi Hamza.
Sipas kreut të PDK-së, partia fituese ka pasur kohë të mjaftueshme për t’i përfunduar konsultimet politike para mbajtjes së seancës, ndërsa kërkesa për shtyrje në momentin e fundit, sipas tij, krijon pasiguri dhe vonesa në krijimin e institucioneve të reja.
Deklarata e Hamzës erdhi menjëherë pasi Albin Kurti njoftoi se nuk do të paraqiste kandidat për kryetar të Kuvendit në seancën konstituive, duke kërkuar më shumë kohë për vazhdimin e konsultimeve me partitë politike, veçanërisht lidhur me arritjen e një marrëveshjeje më të gjerë për çështjen e presidentit të vendit.
Mospropozimi i kandidatit për kryeparlamentar ka bërë që procesi i konstituimit të Kuvendit të mos avancojë sipas pritjeve, ndërsa partitë politike pritet të vazhdojnë bisedimet për të gjetur një zgjidhje që do t’i hapte rrugë formimit të institucioneve të reja të Kosovës.
Be First to Comment