Pronari i një picerie refuzon të japë pica falas, burri ja merr jetën me thikë

Një ngjarje e rëndë ka tronditur qytetin Reggio Emilia në Itali, ku pronari i një picerie është vrarë me thikë pasi refuzoi t’i jepte një picë falas një klienti. Sulmi ndodhi mbrëmjen e së martës në picerinë “Yoghi”, ndërsa gjatë incidentit mbeti e plagosur edhe motra e viktimës, e cila ndodhej në lokal në momentin e ngjarjes.

Sipas mediave italiane dhe agjencisë së lajmeve ANSA, gjithçka ndodhi pak pas orës 22:30, kur një burrë, shtetas i huaj dhe klient i rregullt i picerisë, hyri në lokal dhe kërkoi një picë falas. Pronari i picerisë, Raffaele Stipa, e refuzoi kërkesën, duke i kujtuar se edhe më parë i kishte dhënë ushqim pa pagesë. Sipas raportimeve, ai i është drejtuar me fjalët: “Të kam dhënë tre, mjaft.”

Refuzimi dyshohet se e zemëroi klientin, i cili nxori një thikë dhe e sulmoi pronarin me disa goditje. Stipa humbi jetën si pasojë e plagëve të marra, ndërsa motra e tij u plagos gjatë sulmit, teksa tentoi të ndërhynte. Pas krimit, autori u largua me vrap nga vendi i ngjarjes, duke shkaktuar panik te personat që ndodheshin në afërsi të lokalit.

Policia italiane reagoi menjëherë dhe nisi një operacion të gjerë kërkimi. Vetëm pak orë më vonë, rreth orës 02:00 pas mesnate, i dyshuari u lokalizua dhe u arrestua. Ai ndodhet tashmë në paraburgim, ndërsa ndaj tij pritet të ngrihen akuzat për vrasje dhe plagosje.

Viktima, Raffaele Stipa, ishte në të gjashtëdhjetat dhe me origjinë nga Capo d’Orlando në Siçili. Prej shumë vitesh ai jetonte në Reggio Emilia, ku kishte ndërtuar jetën dhe biznesin e tij. Për rreth dy dekada ai drejtonte picerinë “Yoghi”, e njohur nga banorët e zonës dhe klientët e rregullt.

Motra e tij vazhdon të marrë trajtim në spitalin “Santa Maria Nuova”, ndërsa mjekët bëjnë të ditur se ndodhet jashtë rrezikut për jetën.

Ngjarja ka shkaktuar tronditje të madhe në Reggio Emilia, ku shumë banorë kanë shprehur dhimbjen për humbjen e pronarit të picerisë. Autoritetet italiane po vazhdojnë hetimet për të sqaruar plotësisht rrethanat e krimit dhe për të dokumentuar të gjitha detajet që çuan në këtë akt të rëndë.