Kryetari i Lidhjes Demokratike të Kosovës (LDK), Lumir Abdixhiku, është deklaruar para mediave pas përfundimit të takimit rreth treorësh me kryetarin e Lëvizjes Vetëvendosje, Albin Kurti, i cili u zhvillua në objektin e Kuvendit të Kosovës.
Abdixhiku tha se LDK-ja ka hyrë në procesin e bisedimeve me vullnet të mirë, duke respektuar rezultatin e zgjedhjeve dhe me synimin për të kontribuar në tejkalimin e ngërçit politik.
Sipas tij, pjesëmarrja në takimin e dytë me Vetëvendosjen pas zgjedhjeve të 7 qershorit është bërë në funksion të gjetjes së një zgjidhjeje që i shërben interesit të shtetit dhe qytetarëve të Kosovës.
“Ishte një takim i mirë dhe konstruktiv. Diskutuam për çështje programore, politike dhe për vizionin strategjik të së ardhmes. Do të vazhdojmë përpjekjet që edhe në ditët në vijim të zhvillojmë diskutime më të thelluara”, deklaroi Abdixhiku.
Kreu i LDK-së nuk dha detaje lidhur me temat konkrete të negociatave apo nëse palët janë afruar drejt një marrëveshjeje për formimin e institucioneve të reja.
Megjithatë, ai la të kuptohet se dialogu mes dy partive do të vazhdojë, duke e cilësuar takimin si një hap pozitiv në drejtim të vazhdimit të procesit politik.
Takimi mes Kurtit dhe Abdixhikut u zhvillua në një moment vendimtar për skenën politike në Kosovë, ndërsa vendi ende nuk ka arritur të konstituojë institucionet e reja pas zgjedhjeve parlamentare.
Deklaratat e të dy liderëve tregojnë se, ndonëse ende nuk është arritur një marrëveshje, komunikimi mes Vetëvendosjes dhe LDK-së do të vazhdojë në ditët në vijim, me synimin për të gjetur një zgjidhje për formimin e institucioneve të reja të vendit.
Be First to Comment