“Ma thirre Policinë?” – rrahje mes fqinjëve në Prishtinë, dy persona përfundojnë në ndalim

Një mosmarrëveshje mes fqinjëve në Prishtinë ka përfunduar me ndërhyrjen e Policisë dhe ndalimin e dy personave, pasi një 57-vjeçar pretendon se u sulmua fizikisht nga disa persona pas një njoftimi që kishte bërë në polici.

Burime të Sinjalit bëjnë të ditur se ngjarja ka ndodhur pasditen e 1 gushtit, rreth orës 17:40, në rrugën “Shkupi” në Prishtinë.

Sipas informacioneve të siguruara, Policia e Kosovës kishte pranuar një njoftim për një përleshje në zhvillim. Njësitë policore kanë reaguar menjëherë dhe, me të mbërritur në vendin e ngjarjes, kanë hasur disa persona të përfshirë në incident.

Ankuesi, i identifikuar me inicialet C.Gj., rreth 57 vjeç, ka deklaruar para hetuesve se ishte sulmuar fizikisht nga disa persona pasi kishte njoftuar Policinë lidhur me një situatë në lagje. Sipas deklarimit të tij, konflikti ka eskaluar në dhunë fizike, ku ai është goditur në kokë dhe në fytyrë.

Si pasojë e lëndimeve të marra, 57-vjeçari ka kërkuar ndihmë mjekësore dhe ka marrë trajtimin e nevojshëm, ndërsa raporti mjekësor pritet të jetë pjesë e procedurës hetimore.

Në kuadër të veprimeve hetimore, Policia ka shoqëruar në stacion Faton Azemin, rreth 40 vjeç, Luan Zeqirin, rreth 46 vjeç, dhe Zenel Azemin, rreth 67 vjeç. Gjithashtu janë intervistuar edhe disa dëshmitarë që ndodheshin në vendin e ngjarjes dhe që mund të ndihmojnë në sqarimin e rrethanave të incidentit.

Pas intervistimit të palëve dhe analizimit të provave fillestare, Prokurori i Shtetit ka urdhëruar inicimin e rastit për veprën penale “Lëndim i lehtë trupor”.

Sipas burimeve, dy nga të dyshuarit janë ndaluar për 48 orë dhe janë dërguar në Qendrën e Mbajtjes, ndërsa njëri është liruar në procedurë të rregullt. Hetimet po vazhdojnë për të sqaruar plotësisht rrethanat e ngjarjes, motivin e konfliktit dhe rolin e secilit person të përfshirë.

Policia pritet të vazhdojë mbledhjen e provave dhe marrjen e deklaratave shtesë, ndërsa rasti do të trajtohet në koordinim me Prokurorinë kompetente.

Shënim: Personat e përmendur në këtë rast konsiderohen të pafajshëm derisa fajësia e tyre eventuale të provohet me vendim të formës së prerë të gjykatës.