LAJMI I FUNDIT – Trageti merr flakë, pesë të vdekur dhe 41 të zhdukur

Një tragjedi e rëndë detare ka ndodhur në Indonezi, ku të paktën pesë persona kanë humbur jetën dhe 41 të tjerë rezultojnë ende të zhdukur pasi një traget u përfshi nga flakët gjatë lundrimit në det.

Sipas Agjencisë Kombëtare të Kërkim-Shpëtimit të Indonezisë (Basarnas), në momentin e incidentit në traget ndodheshin qindra pasagjerë dhe anëtarë të ekuipazhit. Zjarri është përhapur me shpejtësi, duke detyruar shumë prej tyre të hidhen në det në përpjekje për t’i shpëtuar flakëve.

Autoritetet kanë bërë të ditur se deri më tani janë shpëtuar 225 persona, ndërsa ekipet e kërkim-shpëtimit vazhdojnë operacionin intensiv për lokalizimin e 41 personave që ende konsiderohen të zhdukur.

Sipas Agjencisë Rajonale të Kërkim-Shpëtimit në Surabaya, disa anije ndodheshin pranë tragetit në momentin e zjarrit dhe u angazhuan menjëherë në operacionin e evakuimit. Megjithatë, katër prej tyre nuk mundën t’i afroheshin menjëherë tragetit për shkak të rrezikut të madh që paraqisnin materialet e ndezshme dhe flakët që kishin përfshirë mjetin lundrues.

Trageti ishte nisur nga qyteti Surabaya, në provincën Java Lindore, me destinacion qytetin Makassar në provincën Sulawesi Jugor. Sipas autoriteteve, kapiteni kishte njoftuar kompaninë për shpërthimin e zjarrit në bord, por pak minuta më vonë komunikimi me të ishte ndërprerë.

Menjëherë pas marrjes së alarmit, autoritetet indoneziane mobilizuan një operacion të gjerë kërkim-shpëtimi, duke angazhuar anije, ekipe emergjente dhe mjete të tjera për të lokalizuar të mbijetuarit dhe për të evakuuar pasagjerët në mënyrë të sigurt.

Zyrtarët e Ministrisë së Transportit të Indonezisë kanë deklaruar se prioritet absolut mbetet shpëtimi i të gjithë personave që mund të ndodhen ende në det.

“Siguria e pasagjerëve dhe ekuipazhit është prioriteti ynë. Po bashkëpunojmë ngushtë me të gjitha institucionet përgjegjëse për ta përfunduar operacionin e evakuimit sa më shpejt dhe në mënyrë sa më të sigurt”, deklaroi një zyrtar i ministrisë.

Ndërkohë, shkaqet e shpërthimit të zjarrit ende nuk janë bërë të ditura. Autoritetet kanë nisur një hetim për të përcaktuar se çfarë e shkaktoi incidentin, ndërsa ekspertët do të analizojnë të gjitha provat pasi të përfundojë operacioni i shpëtimit.

Indonezia, e cila përbëhet nga më shumë se 17 mijë ishuj, mbështetet në transportin detar për lidhjen mes rajoneve të ndryshme. Megjithatë, vendi është përballur vazhdimisht me aksidente detare, të lidhura me mbingarkesën e mjeteve lundruese, mosrespektimin e standardeve të sigurisë dhe kushtet e vështira atmosferike.

Vetëm muajin e kaluar, një tjetër tragjedi detare goditi vendin, kur një traget me mbi 70 persona në bord u fundos pranë ishullit Selayar, duke lënë katër viktima dhe 14 persona të zhdukur.

Operacioni i kërkim-shpëtimit për tragetin e përfshirë nga zjarri vazhdon, ndërsa autoritetet shpresojnë të gjejnë sa më shumë të mbijetuar në orët në vijim.