Nënkryetari i Lidhjes Demokratike të Kosovës (LDK), Lutfi Haziri, ka deklaruar se partia e tij është e gatshme të përmbyllë brenda 24 orëve një marrëveshje politike me Lëvizjen Vetëvendosje (LVV), nëse ekziston vullneti i nevojshëm për formimin e institucioneve të reja të vendit.
Në një intervistë për Radion Evropa e Lirë, Haziri tha se LDK tashmë ka marrë një vendim politik për të qenë pjesë e procesit të ndërtimit të institucioneve, me synimin për të shmangur një krizë të re politike dhe mbajtjen e zgjedhjeve të parakohshme.
Sipas tij, qëndrimi i LDK-së është konfirmuar edhe në Kuvendin e Jashtëzakonshëm të partisë, ku u miratua orientimi për vazhdimin e diskutimeve me subjektet politike në funksion të krijimit të institucioneve të reja.
“Në parim ne jemi pajtuar. Është konfirmuar edhe nga Kuvendi që LDK-ja do të marrë pjesë në procesin e bashkëpunimit për ndërtimin e institucioneve, duke dhënë kontribut në përballimin dhe largimin e një mundësie për zgjedhje tjera në Kosovë”, ka deklaruar Haziri.
Ai shtoi se, nëse Lëvizja Vetëvendosje tregon gatishmëri për të arritur një marrëveshje, procesi mund të përmbyllet shumë shpejt.
“Nëse ka vullnet politik dhe ka gatishmëri, atëherë LDK-ja i përmbyll për 24 orë të gjitha çështjet parimore. Neve nuk na ndan asgjë, ndërkaq ndarja e përgjegjësive është krejt e fundit”, u shpreh nënkryetari i LDK-së.
Haziri theksoi se për LDK-në nuk është prioritet ndarja e posteve, por arritja e një marrëveshjeje të qëndrueshme politike që do të siguronte funksionimin normal të institucioneve.
Sipas tij, partia mbetet e përkushtuar ndaj tri parimeve kryesore që i ka prezantuar edhe më herët: dakordimi për të gjitha institucionet ose për asnjërën prej tyre, hartimi i një agjende të përbashkët shtetërore dhe qeverisëse, si dhe ndarja e përgjegjësive në përputhje me marrëveshjen politike që do të arrihet.
Ai bëri të ditur se këto kushte i janë paraqitur kryeministrit në detyrë dhe kryetarit të Lëvizjes Vetëvendosje, Albin Kurti, gjatë takimit të zhvilluar më 10 korrik, ku LDK-ja është përfaqësuar nga kryetari Lumir Abdixhiku dhe presidentja Vjosa Osmani.
Sipas Hazirit, tashmë topi është në fushën e Vetëvendosjes, e cila duhet të vendosë nëse do t’i pranojë parimet e propozuara nga LDK-ja.
Deklaratat e Hazirit vijnë vetëm një ditë pasi Lumir Abdixhiku u rikonfirmua në krye të LDK-së në Kuvendin e Jashtëzakonshëm të partisë. Pas këtij procesi, udhëheqja e LDK-së njoftoi se pezullimi i diskutimeve me Vetëvendosjen është hequr dhe se partia është e gatshme të vazhdojë bisedimet për krijimin e institucioneve të reja.
Ndërkohë, mbetet të shihet nëse gjatë ditëve në vijim do të ketë një takim të ri ndërmjet përfaqësuesve të dy partive dhe nëse negociatat do të rezultojnë me një marrëveshje për formimin e institucioneve të Kosovës.
Be First to Comment