Një moment tensioni është regjistruar pas përfundimit të seancës konstituive të Kuvendit të Kosovës

Një moment tensioni është regjistruar pas përfundimit të seancës konstituive të Kuvendit të Kosovës, ku një qytetar i është afruar kryetarit të PDK-së, Bedri Hamza, dhe deputetit Enver Hoxhaj, duke i kritikuar për qëndrimin e tyre lidhur me Ligjin për Shtetësinë.

Në pamjet që po qarkullojnë në rrjetet sociale, qytetari dëgjohet duke u drejtuar me tone të ashpra dy zyrtarëve të PDK-së, teksa ata po largoheshin nga objekti i Kuvendit.

“Marre duhet me ju ardhë, turp për votat që i keni se duheni me na përfaqësu”, dëgjohet të thotë qytetari, duke shprehur pakënaqësinë e tij për mënyrën se si, sipas tij, është trajtuar çështja e Ligjit për Shtetësinë.

Pavarësisht reagimit të qytetarit, situata nuk eskaloi më tej dhe nuk pati asnjë incident fizik. Bedri Hamza dhe Enver Hoxhaj vazhduan rrugën e tyre, ndërsa momenti u filmua dhe më pas u shpërnda gjerësisht në rrjetet sociale.

Videoja ka nxitur reagime të shumta në internet, ku qytetarët kanë shprehur qëndrime të ndryshme lidhur me protestën dhe me debatin për Ligjin për Shtetësinë, një çështje që vazhdon të jetë në qendër të diskutimeve politike në vend.