Ja çka paralajmeron Shefi i Kabinetit të Perparim Ramës që u akuzua nga Vetevendosje

Florent Maliqi, shefi i kabinetit të kryetarit të Prishtinës, Përparim Rama, ka reaguar publikisht ndaj akuzave të ngritura së fundmi ndaj tij, duke i mohuar kategorikisht pretendimet për përfshirje në keqpërdorim të detyrës zyrtare dhe duke i cilësuar ato si të pavërteta.

Përmes një deklarate për media të shpërndarë nga Zyra për Informim e Kryeqytetit, Maliqi ka thënë se akuzat e bëra ndaj tij nuk qëndrojnë dhe se ato janë pjesë e një fushate, e cila sipas tij ka për qëllim dëmtimin e reputacionit të tij personal dhe institucional.

Ai theksoi se është i gatshëm të bashkëpunojë plotësisht me organet e drejtësisë dhe se pret që hetimet të zbardhin të gjitha rrethanat e rastit.

“Pretendimet e ngritura ndaj meje janë tërësisht të pavërteta, qesharake dhe pjesë e një fushate të ulët denigruese që synon të dëmtojë integritetin tim personal dhe institucional. Në bashkëpunim të plotë me Prokurorinë dhe institucionet kompetente, pres zbardhjen e plotë të kësaj çështjeje, përfshirë identifikimin e personave që qëndrojnë prapa këtij fabrikimi, denigrimi dhe linçimi publik”, thuhet në reagimin e Maliqit.

Shefi i kabinetit të kryetarit të Prishtinës ka bërë të ditur se, përveç bashkëpunimit me institucionet përgjegjëse, do të ndërmarrë edhe të gjitha veprimet ligjore që i lejon ligji për të mbrojtur integritetin e tij dhe për të kërkuar përgjegjësi ndaj personave që, sipas tij, kanë fabrikuar dhe shpërndarë pretendimet në fjalë.

Sipas Maliqit, procesi duhet të zhvillohet në institucionet e drejtësisë dhe jo në hapësirën publike, duke shtuar se beson se faktet do të sqarojnë çdo pretendim të ngritur ndaj tij.

Reagimi i tij vjen pasi Lëvizja Vetëvendosje dorëzoi kallëzim penal në Prokurorinë Speciale të Republikës së Kosovës ndaj Florent Maliqit dhe disa zyrtarëve të tjerë të kabinetit të Komunës së Prishtinës.

Sipas njoftimit të bërë nga LVV-ja, kallëzimi penal lidhet me dyshime për keqpërdorim të detyrës zyrtare në disa procese komunale. Megjithatë, deri më tani Prokuroria Speciale nuk ka bërë të ditur nëse ka nisur hetime lidhur me këto pretendime apo në cilën fazë ndodhet shqyrtimi i kallëzimit.

Rasti pritet të trajtohet nga organet kompetente, të cilat do të vlerësojnë materialet e dorëzuara dhe do të vendosin për hapat e mëtejmë proceduralë në përputhje me legjislacionin në fuqi.

Në përputhje me parimin e prezumimit të pafajësisë, çdo person ndaj të cilit ngrihen pretendime apo kallëzime penale konsiderohet i pafajshëm derisa përgjegjësia e tij eventuale të provohet me vendim të formës së prerë të gjykatës.