Detaje të reja dhe të dhimbshme janë bërë të ditura nga aksidenti i rëndë që ndodhi gjatë natës në Manzë të Durrësit, ku tre persona humbën jetën dhe dy të tjerë mbetën të plagosur.
Sipas Top Channel, dy prej viktimave, Kleo Vrioni dhe shtetasja italiane Sara Brugentelli, 26 vjeçe, ishin martuar vetëm pak ditë para aksidentit tragjik.
Çifti ndodhej së bashku në automjetin tip BMW në momentin kur ndodhi aksidenti, i cili përfundoi me pasoja fatale.
Sipas informacioneve paraprake, automjeti drejtohej nga Kleo Vrioni, i cili dyshohet se në një moment ka humbur kontrollin mbi mjetin.
BMW-ja më pas është përplasur me një strukturë betoni, ndërsa goditja ka rezultuar fatale për tre prej personave që ndodheshin në automjet.
Jetën e humbën Kleo Vrioni, bashkëshortja e tij Sara Brugentelli dhe 15-vjeçari Alvi Muhaxhiri.
Fakti që Kleo dhe Sara kishin kurorëzuar dashurinë e tyre vetëm pak ditë më parë e ka bërë edhe më tragjike ngjarjen për familjarët dhe të afërmit e tyre.
Nga aksidenti kanë mbetur të plagosur edhe Rejsi Vrijoni, 25 vjeç, dhe Klevis Dervishi, 16 vjeç.
Gjendja shëndetësore e 16-vjeçarit raportohet të jetë e rëndë, ndërsa ai po merr trajtimin e nevojshëm mjekësor.
Aksidenti ka shkaktuar tronditje të madhe te familjarët dhe të afërmit e viktimave, ndërsa brenda një nate tre jetë u shuan tragjikisht.
Autoritetet kanë nisur hetimet për të përcaktuar dinamikën e saktë të aksidentit dhe shkaqet që çuan në humbjen e kontrollit të automjetit.
Grupi hetimor po vazhdon punën për zbardhjen e plotë të rrethanave të tragjedisë, ndërsa pritet që hetimet të përcaktojnë se çfarë ndodhi në momentet para përplasjes fatale.
Be First to Comment