Dy të rinj kanë humbur jetën tragjikisht si pasojë e një aksidenti të rëndë trafiku që ka ndodhur në orët e para të mëngjesit në fshatin Smrekovnicë të Vushtrrisë.
Aksidenti ka ndodhur rreth orës 02:53 në rrugën nacionale Mitrovicë–Prishtinë, përkatësisht në segmentin rrugor që kalon nëpër fshatin Smrekovnicë.
Sipas informacioneve të bëra të ditura nga Policia e Kosovës, në aksident është përfshirë një veturë, në të cilën ndodheshin dy persona, shoferi dhe pasagjeri.
Si pasojë e aksidentit, të dy të rinjtë kanë pësuar lëndime të rënda dhe janë dërguar për trajtim mjekësor.
Pavarësisht përpjekjeve për t’ua shpëtuar jetën, mjekët kanë konstatuar vdekjen e të dyve.
Viktimat janë dy meshkuj të moshës 22 dhe 24 vjeç.
“Të njëjtit janë dërguar për trajtim mjekësor, ku mjekët kanë konstatuar vdekjen e tyre. Me urdhër të prokurorit kompetent, trupat e pajetë të viktimave, meshkuj të moshës 22 dhe 24 vjeç, janë dërguar në Institutin e Mjekësisë Ligjore për obduksion”, thuhet në njoftimin e Policisë.
Në vendin e ngjarjes kanë dalë njësitë kompetente policore, të cilat kanë nisur ekzaminimin dhe mbledhjen e provave për të përcaktuar dinamikën e aksidentit.
Ende nuk janë bërë të ditura rrethanat që kanë çuar deri te humbja e kontrollit të automjetit dhe aksidenti me pasoja fatale.
Me urdhër të prokurorit kompetent, trupat e pajetë të dy të rinjve janë dërguar në Institutin e Mjekësisë Ligjore për obduksion.
Identitetet e viktimave nuk janë bërë ende publike nga autoritetet.
Policia e Kosovës ka bërë të ditur se hetimet për përcaktimin e shkakut dhe zbardhjen e plotë të rrethanave të aksidentit tragjik në Smrekovnicë janë duke vazhduar.
Be First to Comment