Lumir Abdixhiku i përgjigjet Vetevendosjes!

Asnjë nga partitë kryesore opozitare nuk i është përgjigjur pozitivisht ftesës së ushtrueses së detyrës së Presidentes së Kosovës, Albulena Haxhiu, për takimin konsultativ të paraparë për nesër në orën 09:00.

Pas PDK-së dhe AAK-së, të cilat e refuzuan ftesën më herët, edhe LDK-ja ka bërë të ditur se nuk do të marrë pjesë në takimin e thirrur nga Haxhiu.

Edhe Abdixhiku i thotë “jo” ftesës

Refuzimin e LDK-së e ka konfirmuar kryetari i kësaj partie, Lumir Abdixhiku, në një deklaratë për televizionin Dukagjini.

Abdixhiku ka bërë të qartë se LDK-ja preferon që bisedimet politike për zgjidhjen e krizës të zhvillohen drejtpërdrejt ndërmjet kryetarëve të partive.

“Ne takimet i zhvillojmë me kryetarët e partive, në këtë rast takimin e vetëm që mund ta bëjmë është me kryetarin e LVV-së, Albin Kurtin. Në pikëpamjet tona, zonja Haxhiu është deputete e Kuvendit dhe, në këtë rrjedhë, ne mund të flasim vetëm me ata që janë përgjegjës për këtë punë”, ka deklaruar Abdixhiku.

PDK dhe AAK kishin refuzuar më herët

Para LDK-së, ftesës së Haxhiut i ishin përgjigjur negativisht edhe PDK-ja dhe AAK-ja.

Haxhiu kishte ftuar liderët e partive politike ose përfaqësuesit e tyre në një takim të përbashkët për të diskutuar zhvillimet aktuale politike dhe institucionale në vend.

Sipas ftesës, në qendër të diskutimeve do të ishte edhe arritja e një marrëveshjeje për një president konsensual dhe formimi i institucioneve të tjera.

Kriza politike vazhdon

Refuzimi i tri partive e komplikon edhe më tej përpjekjen për të zhvilluar një takim të përbashkët politik nën ndërmjetësimin e ushtrueses së detyrës së Presidentes.

Qëndrimi i Abdixhikut tregon se LDK-ja nuk e përjashton dialogun politik, por kërkon që ai të zhvillohet në nivel të kryetarëve të partive, konkretisht me liderin e LVV-së, Albin Kurtin.