Deputetja e zgjedhur e Lidhjes Demokratike të Kosovës, Jehona Lushaku-Sadriu, ka folur para mbledhjes së Grupit Parlamentar të LDK-së, duke sqaruar qëndrimin e partisë lidhur me zhvillimet e së mërkurës në Kuvendin e Kosovës.
Lushaku-Sadriu ka konfirmuar se deputetët e LDK-së kanë qenë në Kuvend dhe kanë qenë të informuar për aksionet që po zhvilloheshin, por ka theksuar se partia ka zgjedhur një qasje më të kujdesshme për të shmangur përshkallëzimin e situatës.
Sipas saj, Kosova ndodhet në një moment të ndjeshëm politik dhe kushtetues, ndërsa partitë duhet të tregojnë përgjegjësi në mënyrën se si veprojnë.
LDK mbledh Grupin Parlamentar
Lushaku-Sadriu ka bërë të ditur se takimi i sotëm është mbledhje e rregullt e Grupit Parlamentar, ku do të diskutohen zhvillimet e fundit politike.
“Është takimi i rregullt i grupit parlamentar sot. Për me i diskutuar zhvillimet politike edhe me i konfirmuar qëndrimet tona si parti”, ka deklaruar ajo për Ekonomia Online.
Mbledhja pritet të shërbejë edhe për harmonizimin e qëndrimeve të deputetëve të LDK-së për situatën e krijuar rreth konstituimit të Kuvendit.
“Kemi qenë të vetëdijshëm për aksionet”
E pyetur për zhvillimet e një dite më parë, Lushaku-Sadriu ka konfirmuar se LDK-ja kishte informacione për veprimet që po ndërmerreshin.
“Kemi qenë në kontakt, kemi qenë të vetëdijshëm edhe për aksionet, por tani jemi në një udhëkryq për gjithë vendin edhe në një sfidë kushtetuese për të cilën vërtet duhet me pasur qasje edhe të kujdesshme”, ka deklaruar ajo.
Sipas saj, kujdesi është i domosdoshëm edhe për shkak të ndjeshmërisë që qytetarët kanë ndaj institucioneve të Kosovës.
Thirrje partisë së parë: Konstituojeni Kuvendin
Pavarësisht qasjes së LDK-së ndaj aksioneve të opozitës, Lushaku-Sadriu ka qenë e qartë në kërkesën për zhbllokimin e Kuvendit.
Ajo i ka bërë thirrje partisë së parë që ta thërrasë seancën dhe të ndërmarrë veprimet e nevojshme për konstituimin e institucionit.
“Unë po vazhdoj me i bërë thirrje partisë së parë që ta thërrasë seancën edhe ta konstituojnë Kuvendin dhe të bëjnë veprimet që i takojnë e jo ta lënë gjithë vendin në bllokadë”, ka thënë Lushaku-Sadriu.
Sipas saj, përgjegjësia kryesore në këtë fazë duhet të jetë krijimi dhe funksionalizimi i institucioneve.
Tregon pse LDK nuk dëshiron eskalim të situatës
Deputetja e LDK-së ka konfirmuar edhe një herë se përfaqësuesit e partisë kanë qenë në Kuvend të mërkurën.
Megjithatë, ajo ka theksuar se LDK-ja nuk dëshiron që veprimet politike të marrin një drejtim që mund të çojë në tensione më të mëdha.
“Po, po, kemi qenë në Kuvend, por tani si parti duhet me pasur edhe përgjegjësinë e lartë në kuptimin e thirrjes për me i bërë institucionet, por gjithmonë duke parasysh edhe momentin, duke mos i dhënë kahje tjetër”, ka deklaruar ajo.
Lushaku-Sadriu ka përdorur edhe një formulim më të drejtpërdrejtë për rrezikun që, sipas saj, duhet shmangur.
“Ne nuk duam që të shkojmë tek një përçarje qytetare dhe një konflikt”, ka thënë ajo.
A ka marrë LDK ftesë nga Albin Kurti?
Lushaku-Sadriu është pyetur edhe nëse LDK-ja ka marrë ndonjë ftesë për takim nga kryeministri në detyrë, Albin Kurti.
Ajo ka deklaruar se nuk ka dijeni për një ftesë të tillë.
“Jo, nuk jam e vetëdijshme që ka pasur edhe me gjasa nuk ka”, ka thënë Lushaku-Sadriu.
Pas përfundimit të mbledhjes së Grupit Parlamentar pritet që LDK-ja të bëjë më të qarta qëndrimet e saj për zhvillimet e fundit dhe hapat që do të ndërmarrë në raport me procesin e konstituimit të Kuvendit.
Be First to Comment